ထိရောက်တဲ့ သင်ကြား/ယူရေးပုံစံဖြစ်စေဖို့
အခုခေတ် ပညာရေးစနစ်ဟာ တိုးတက်ပြောင်းလဲနေပါပြီ။ လက်တွေ့ဘ၀က လိုအပ်ချက်တွေဟာ သမားရိုးကျ သင်ကြားမှုတွေနဲ့ မလုံလောက်တော့ပါဘူး။ သမားရိုးကျ ဆရာအခြေပြု သင်ကြားရေးထက် ပိုထိရောက်တဲ့ ရှုထောင့်ကနေ ချဉ်းကပ်ဖို့ လိုအပ်လာပါပြီ။ ဒီလိုပြောလို့ သင်ကြားတဲ့ ဆရာ/မတွေရဲ့ အရေးပါမှုက နည်းသွားပြီလို့ မဆိုလိုပါဘူး။ လေ့လာသင်ယူမှု ထိရောက်မြန်ဆန်စေဖို့ ဆရာ/မတွေရဲ့ အခန်းကဏ္ဍက အဓိကကျနေဆဲဖြစ်ပါတယ်။ ကျောင်းသား/သူတစ်ယောက်ချင်းစီရဲ့ စိတ်နေသဘောထားနဲ့ အားသာချက်အားနည်းချက်တွေကို မြန်မြန်နားလည်ခြင်းဟာ ထိရောက်တဲ့ သင်ကြားမှု ဖြစ်ဖို့ လိုအပ်ချက်တစ်ခု ဖြစ်ပါတယ်။ လေ့လာသင်ယူမှုတွေမှာ နားလည်စွာ မှတ်မိနိုင်ဖို့နဲ့ ပြန်လည်အသုံးချနိုင်စွမ်းဟာ အရေးကြီးတဲ့ သော့ချက်ပဲ ဖြစ်ပါတယ်။ ပညာရပ်အားလုံးဟာ သင်ယူသူအဖို့ စိတ်ပါလက်ပါရှိနေသရွေ့ သင်ယူရတာ လွယ်ကူပြီး ပျော်စရာကောင်းနေစမြဲ ဖြစ်ပါတယ်။
Board Games အများစုဟာ ပြဿနာ(ပုစ္ဆာ)ဖြေရှင်းခြင်းကို အခြေခံပါတယ်။ သင်ပြမှုတစ်ခုတည်းနဲ့မတတ်မြောက်နိုင်တဲ့ Critical Thinking, Strategical Thinking Skills တွေကို ပုစ္ဆာဖြေရှင်းခြင်းကနေပဲ အထိရောက်ဆုံး လေ့ကျင့်ယူနိုင်တယ်လို့ သုတေသနတွေက ထောက်ပြကြပါတယ်။ အတူဖြေရှင်းခြင်းအားဖြင့် တစ်ဦးနဲ့တစ်ဦး စိတ်အနေအထား အားသာချက်အားနည်းချက်တွေကိုလည်း အချိန်တိုအတွင်း သိမြင်နိုင်တယ်။ ဒါကြောင့်လည်း Board Games (Tabletop Games) တွေကို သင်ထောက်ကူပစ္စည်း အဖြစ်အသုံးချနိုင်မယ် ဆိုတာကို ယုံကြည်တဲ့အတွက် SPACE 17 - Board Game Hub က ရည်ရွယ်ချက်အဖြစ် ထည့်သွင်းကာ သင်ရိုးများပေါ် ပေါက်လာစေရန် ရည်ရွယ်ပြီး ဒီ Forum မှာပါ ခေါင်းစဥ် တစ်ခုအနေနဲ့ ထည့်သွင်းပေးထားပါတယ်။